Një 34-vjeçar nga Fushë-Mamurrasi është arrestuar nga policia e Kurbinit, pasi gjatë kontrollit në banesë dhe magazinën e lokalit në pronësi të tij u gjetën drogë, lëndë plasëse, municione luftarake si edhe një sërë materialesh e vegla pune të ndryshme, si prova që dokumentojnë autorësinë e një sërë vjedhjesh të ndodhura.
Uniformat blu kanë bërë të ditur se kanë arrestuar në flagrancë Zef Markun.
“U gjetën dhe sekuestruan në cilësinë e provës materiale: 2 kallepë lëndë plasëse TNT, 3 kapsolla elektrodetonatore, 1 granatë difensive, 310 fishekë model 56, 130 gr. lëndë narkotike e dyshuar Marijuanë, 1 mjet me targa që i përkasin një mjeti tjetër, 20 celularë dhe 3 numra telefoni, 20 vegla pune të ndryshme (motosharra, pompa uji, saldatriçe, gur fresibël etj.) 13 pajisje elektronike (laptop, magnetofon, 6 aparate fotografike digitale etj), 6 pajisje elektroshtëpiake ( televizor, hekura, pajisje vakumi etj.) 3 kuti me aksesorë të ndryshëm (kaçavida, çelsa), pajisje makinash (3 çelësa automjetesh , aparate navigatore, aparate për karikim baterish) etj.
Këto materiale dyshohen të jenë përfituar nga veprimtaria kriminale e vjedhjes së banesave, magazinave, serviseve etj, të ndodhura në territorin që mbulon Komisariati i Policisë Kurbin, për të cilat po punohet për dokumentimin ligjor të tyre”, – thuhet ndër të tjera në njoftimin e policisë.
Ndërkaq, gjatë kontrolleve, janë shoqëruar në ambientet e policisë për verifikim 10 persona, kryesisht me precedentë penalë për armëmbajtje pa leje , vjedhje dhe prodhim e shitje të lëndëve narkotike.